Gengið frá samkomulagi í dag við PCC

Fulltrúar Framsýnar/Þingiðnar gengu í dag frá samkomulagi við PCC um framkvæmd á vinnutímastyttingu sem tekur gildi um næstu mánaðamót meðal starfsmanna PCC á Bakka og samið var um í síðustu kjarasamningum að tæki gildi 1. október 2020.

Samkvæmt samkomulaginu styttist vinnutíminn um 6 virka daga eða 48 dagvinnustundir á ársgrundvelli. Þegar mest var störfuðu um 150 starfsmenn hjá fyrirtækinu. Eins og fram hefur komið í fjölmiðum var 80 starfsmönnum fyrirtækisins sagt upp í sumar og hafa uppsagnirnar verið að koma til framkvæmda. Á næstu mánuðum munu því um 50 til 60 starfsmenn starfa hjá fyrirtækinu við  viðhald, rekstur og önnur störf innan fyrirtækisins.

Samkvæmt samkomulaginu styttist virkur vinnutími 1. október 2020 úr 37 klst. og 5 mín. á viku í 36 klst. að meðaltali á viku eða 156 klst. á mánuði m.v. meðalmánuð án skerðingar á mánaðarlaunum starfsmanns. Vinnutímastytting leiðir ekki til breytinga á vaktakerfi, fjölda dag- og yfirvinnustunda eða mánaðarlaunum.

Vinnutímastyttingu vaktavinnumanna verður safnað upp með þeim hætti að starfsmaður fær frí sem nemur heilum vöktum. Samkomulag er um að vinnutímastytting í 12 klst. vaktakerfi nemi fjórum 12 klst. vöktum m.v. fullt ársstarf. Starfsmaður heldur dagvinnulaunum með vaktaálagi, án yfirvinnugreiðslna.

Hjá dagvinnumönnum getur vinnutímastytting komið til framkvæmda sem styttri vinnutími viku hverja, mánaðarleg stytting eða annað fyrirkomulag sem ákveðið verður að höfðu samráði við starfsmenn. Miðað við fullt ársstarf er samkomulag um að vinnutímastytting nemi sex dögum á dagvinnulaunum, án yfirvinnugreiðslna (eða fjórum vinnudögum m.v. 10 klst. vinnudag).

Frívaktir / frídagar vegna vinnutímastyttingar skulu teknar innan 14 mánaða frá því rétturinn skapaðist. Óteknar frívaktir / frídagar skuli gerðar upp við starfslok.

Frívaktir skulu teknar í samráði við næsta yfirmann í tilfellum vaktavinnumanna og miðað er við að frívaktar sé óskað með að lágmarki tveggja vikna fyrirvara.

Hjá dagvinnumönnum er almenna reglan að stytting sé tekin út á sama hátt og hjá skrifstofufólki með styttri vinnudegi á föstudögum, en annars í samráði við næsta yfirmann.

Það voru Dögg Stefánsdóttir mannauðsstjóri PCC og Rúnar Sigurpálsson forstjóri PCC sem gengu frá samningnum í dag fyrir hönd fyrirtækisins. Frá stéttarfélögunum Framsýn og Þingiðn skrifaði Aðalsteinn Árni Baldursson undir samninginn. Mikill ánægja er með samninginn meðal samningsaðila.

 

Deila á