Töluverð umræða hefur verið um málefni Raufarhafnar síðustu mánuðina vegna þeirrar miklu fólksfækkunar sem þar hefur orðið. Þá hefur jafnframt atvinnulífi á staðnum hnignað verulega.
Byggðastofnun ásamt heimaaðilunum hefur unnið markvist að því að kortleggja vandann með íbúum Raufarhafnar. Í því sambandi hafa verið haldnir nokkrir fundir með íbúum staðarins. Sá síðasti í þessari röð funda var haldinn í gær í félagsheimilinu á Raufarhöfn. Um 60 íbúar og gestir tóku þátt í fundinum.
Á fundinum var farið yfir umræðuna og niðurstöðu fundanna sem haldnir hafa verið. Greinilegt er að íbúar staðarins leggja höfuð áherslu á að auka sjávarútveg og fiskvinnslu auk þess að efla ferðaþjónustu. Þá ríkir ófremdarástand í löggæslumálum allt frá Bakkafirði til Kópaskers þar sem einum lögreglumanni er ætlað að sinna öllu svæðinu. Íbúar Raufarhafnar telja afar mikilvægt að lögreglumaður/menn verði ávalt til staðar á Raufarhöfn.
Á fundinum kom einnig fram að búið er að ráða Kristján Þ. Halldórsson í starf verkefnisstjóra frá 1. mars nk. Kristjáni er m.a. ætlað að vinna með þá punkta sem fram komu á íbúafundunum en margar góðar hugmyndir hafa komið fram sem áhugvert verður að fylgjast með. Í lokin sameinuðust fundarmenn og sögðu ÁFRAM RAUFARHÖFN!!!!!!!!!!
Góður andi var á fundinum þrátt fyrir stöðuna sem Raufarhafnarbúar hafa þurft að búa við undanfarin ár.
Hér má sjá forgangsröðun heimamanna. Þau atriði sem skora mest hjá heimamönnum er aukinn sjávarútvegur og ferðaþjónusta.