Óhætt er að segja að mikið álag sé um þessar mundir hjá forsvarsmönnum og starfsmönnum stéttarfélaga vegna yfirstandandi kjaraviðræðna við atvinnurekendur og þá er undirbúningur á fullu varðandi aðra kjarasamninga sem falla úr gildi eftir áramótin eins og hjá starfsmönnum sveitarfélaga og hjá ríkinu.
Dagskráin er svona þessa vikuna:
Undirbúningsfundur stendur yfir í Reykjavík í dag vegna kjarasamnings Starfsgreinasambands Íslands og ríkisins sem Framsýn á aðild að. Kjarasamningurinn er laus 31. mars 2019. Fulltrúar frá Framsýn taka þátt í þessari undirbúningsvinnu.
Á morgun þriðjudag er sömuleiðis undirbúningsfundur í Reykjavík vegna kjarasamnings Starfsgreinasambands Íslands og sveitarfélaga sem Framsýn á aðild að. Kjarasamningurinn er laus 31. mars 2019. Fulltrúar frá Framsýn taka þátt í þessari undirbúningsvinnu.
Á miðvikudag er samningafundur á Húsavík milli PCC Bakkisilicon og stéttarfélaganna Framsýnar og Þingiðnar. Fulltrúar frá Samtökum atvinnulífsins taka einnig þátt í fundinum.
Á fimmtudag er síðan fundur í Reykjavík um ferðaþjónustusamninginn milli Starfsgreinasambands Íslands og Samtaka atvinnulífsins. Um er að ræða samlestur á kjarasamningum sem til stendur að sameina í einn kjarasamning. Fulltrúi frá Framsýn mun taka þátt í þessari vinnu.
Þegar þetta er skrifað hefur ekki verið settur á samningafundur á föstudag. Eins og sjá má á þessu yfirliti er mikið að gera um þessar mundir og dagskráin verður svona áfram næstu vikurnar og mánuðina.